Eva Einarsdóttir er í framboði fyrir Bjarta framtíð í Reykjavík, við fengu hana til að svara nokkrum spurningum

“Ég heiti Eva Einarsdóttir og er í framboði fyrir Bjarta framtíð í Reykjavík. Ég hef verið svo lánsöm að vera borgarfulltrúi fyrir Besta flokkinn síðustu ár og eins hef ég verið formaður Íþrótta- og tómstundaráðs sem hefur verið ákaflega skemmtileg reynsla. Að starfa í þágu borgarbúa er ótrúlega fjölbreytt, krefjandi og lærdómsríkt. Mig langar því gjarnan að halda áfram, byggja á því sem ég hef lært og vonandi leiða eitthvað gott af mér.”

Hvaða stefnumál tengd heilsu eru þið með á ykkar stefnuskrá?

Að halda áfram að vinna eftir íþróttastefnu Reykjavíkur sem samþykkt var árið 2012, halda áfram þeirri uppbyggingu sem hefur átt sér stað í sundlaugum Reykjavíkur, að styðja enn frekar við jaðaríþróttir, að halda áfram að bæta aðstöðu fyrir hjólreiðafólk og hvetja fólk til að vera jákvætt og þakklátt því fátt er betra fyrir heilsuna.

Hvað finnst þér um að íslendingar séu orðin ein feitasta þjóðin á Norðurlöndunm?    

Þetta er ekki góð þróun og við þurfum að snúa því við. En mér finnst samt mikilvægt að við miðum ekki eingöngu við holdafar fólks, heldur heilsu þess og hvernig því líður. Þá er mjög mikilvægt að sveitafélög styðji við aukna lýðheilsu.

Getur þú svarað því hvenær það kemur yfirbyggður fótboltavöllur í Laugardaginn hjá Þrótti knattspyrnufélagi?

Ekki hefur staðið til að byggja slíkan völl, en aftur á móti þarf í nánustu framtíð að huga að aukinni íþróttaaðstöðu og þá í samvinnu við Þrótt og aðra íbúa við Laugardalinn.

Hvenær mun frjálsíþróttafólk í Reykjavík geta æft og keppt á sínum eigin velli?        

Nýlega var samþykkt að gera nýjan æfingavöll fyrir frjálsar íþróttir í Breiðholti, enda ÍR stærsta frjálsíþróttafélag Reykjavíkur og reyndar í Evrópu. Ég er mjög stolt af þeirri uppbyggingu. Eins er í gangi skipulagsvinna um framtíð vallarins í Laugardal sem er m.a. í  samvinnu við Frjálsíþóttafélag Reykjavíkur og Frjálsíþróttasambandið.

Hver er stefna þíns flokks/framboðs gagnvart þeim heilsufarslegu áhrifum sem hljótast geta af of miklum styrk brennisteinsvetnis í andrúmslofti eins og raunin er núna á nokkrum svæðum á höfuðborgarsvæðinu og hlýst af mengun frá Hellisheiðarvirkjun?

Við viljum draga úr mengun sama hvaðan hún kemur.  Sú áhersla sem Björt framtíð leggur á betri byggð og skipulagsmál er ekki síst vegna umhverfisþáttarins, markmiðið er að draga verulega úr mengun.  Hvað varðar mengun frá Hellisheiðarvirkjun er mikilvægt að rannsaka það vel og vandlega og bregðast  skjótt og örugglega við ef í ljós kemur að mengun frá henni hafi skaðleg áhrif. Við höfum trú á því að þær aðgerðir sem Orkuveita Reykjavíkur hefur farið í muni skila árangri. Jafnframt höfum við verið fullvissuð um að ef þær aðgerðir skila ekki tilætluðum árangri, þá sé jafnhliða unnið að varaáætlunum. 

Hvað gerir þú til að halda þér í góðu formi?

Ég fer reglulega út að hlaupa, æfi blak yfir veturinn og geri stundum jóga. Væri líka alveg til í að fara oftar í badminton, fara á kajak og jafnvel í skylmingar, bara svona til að hafa gaman af.

Spáir þú mikið í mataræðið?

Já og nei, ekki svona dag til dags. Borða frekar heilsusamlega, er grænmetisæta og þarf því aðeins að gæta þess að borða fjölbreytt og finnst mjög skemmtilegt að elda nýja rétti. Er líklega frekar heppin þegar kemur að því að ég er sólgin í holla hluti og er ekki mjög hrifin af sætindum

Ef þú værir beðin um að gefa gott ráð til hóps af fólki, hvaða ráð væri það?

Reyna að líta á hvern dag sem gjöf, finna sér einhverja skemmtilega hreyfingu að stunda, prófa nýja hluti og gefa sér sjálfum séns.