Rauðspretta í möndluraspi með grænkáls- og sætkartöflumús

Það er í miklu uppáhaldi hjá mér að steikja fisk í möndluraspi og það þrælvirkar með hvaða hvíta fisk sem er.

Um daginn steikti ég rauðsprettu með þessum hætti og útbjó karamellaða grænkáls- og sætkartöflumús með. Þessi góða máltíð var svo fullkomnuð með soðnu bankabyggi og vel af fersku salati.

Fiskurinn:

1 rauðsprettuflak

2 dl möndlur

Salt og pipar

1 egg

Olía til steikingar

Steinselja til skreytingar

Karamelluð grænkáls- og sætkartöflumús:

1 stór sæt kartafla

1 msk olía

1 laukur 

20-30 g ferskt grænkál

1 dl kókosmjólk

1 cm engifer 

1 tsk kanill

Salt og pipar

Aðferð - Fiskur:

1) Brjótið egg í skál og pískið með gaffli.

2) Malið möndlurnar í mjöl og hellið á disk, saltið létt og piprið.

3) Hitið olíu á pönnu.

4) Skerið fiskinn í smærri bita og veltið fyrst upp úr eggjahrærunni og svo möndlunum.

5) Steikið á hvorri hlið þar til fiskurinn er fulleldaður.

6) Færið í fat eða á disk og skreytið með steinselju.

Aðferð - Grænkáls- og sætkartöflumús:

1) Bakið sætu kartöfluna í ofni í hýðinu við 180 gráður í um klukkustund.

2) Skerið laukinn og steikið á pönnu þar til hann hefur náð að karamellast vel.

3) Flettið hýðinu af sætu kartöflunni og vinnið ásamt lauknum í mús í matvinnsluvél.

4) Bætið restinni af uppskriftinni við og vinnið áfram í matvinnsluvélinni þar til þið eruð komin með fallega græna mús með silkimjúkri áferð.

Uppskrift af vef birnumolar.com