Hugleiðing dagsins frá Guðna Gunnarssyni lífsráðgjafa

Að fyrirgefa er að elska

Að taka ábyrgð og fyrirgefa sjálfum sér er eins og að horfa á krepptan hnefa sinn, ákveða að sleppa spennunni og opna lófann.

Það skiptir ekki máli hversu oft þú hafnar þér – aðeins hversu oft þú tekur við þér til baka.

Það skiptir ekki máli hversu oft þú ferð – aðeins hversu oft þú kemur.

Í hvert skipti sem þú ferð ertu að yfirgefa þig. Í hvert skipti sem þú kemur ertu að elska þig.

Forsenda ábyrgðar er fyrirgefning. Ábyrgð er forsenda fyrirgefningar.

Að fyrirgefa þýðir að mæta til fulls inn í augnablik máttarins og öðlast þar mátt viljans – til að valda í vitund, viljandi, eigin orku og tilvist.

Um leið og við tökum ábyrgð með bros á vör erum við mætt og máttug. Álögunum er aflétt og því fylgir mikið frelsi.