Hverju ert þú að útvarpa - Guðni með hugleiðingu á sunnudegi

Heitbundið hjarta er ómur velsældar og tíðni einingar og hamingju

Þegar ungviðið vex í móðurkviði er það hjartað sem mótast fyrst. Út frá hjartanu vaxa svo limirnir. Hjartað er keisarinn og uppruni alheims er sagður búa í hjarta hvers manns. Hjartað er einnig tákn flóðs og fjöru, samdráttar og útvíkkunar. Sláttur þess myndar hljóm sem ómar á tíðni þeirrar ástar sem býr í okkar hjarta. Þannig sendum við frá okkur bylgjur sem tjá smæstu frumu líkamans ásetning okkar og fyrirætlanir, tilgang og tón þeirrar ástar sem við njótum. Þessar bylgjur óma um alla tilveruna og laða að okkur velsæld og ást sem er á sömu bylgjulengd og tíðni – því að líkur sækir líkan heim.