Um næringu frá Guðna lífsráðgjafa
Það er margt sem mig langar að segja þér um næringu, reyndar svo margt að það gæti fyllt heila bók.
Hér læt ég samt nægja að stikla á stóru. Sumt af því er bratt en öðru muntu eiga auðveldara með að kyngja. Reynslan segir mér að fyrir langflestum séu mataræði trúarbrögð. Hver og einn hefur skapað sér vana og kæki í neyslu og margir eru tilbúnir að verja mynstrið með kjafti og klóm.
Kjötætur gera stólpagrín að grænmetisætum og grænmetisætur líta niður á kjötætur. Samt hafa báðir aðilar rétt fyrir sér – báðir eru að sækja sér það sem þeir vilja og þurfa. Hafðu þetta í huga við lesturinn – fylgstu með eigin viðbrögðum, skynjaðu gagnvart hvaða upp- lýsingum þú upplifir viðnám og dragðu af því lærdóm.
Ekkert í heiminum breytist á meðan allir ríghalda í sinn sannleika, en allt breytist þegar þú ert fús til að ögra þeim viðhorfum sem þú hefur hingað til lifað eftir.
Samt er staðreyndin sú að enginn hefur fundið hinn stóra sannleika og við erum satt best að segja fremur skammt á veg komin í því að rannsaka áhrif næringar á líkama og sál. Þess vegna er hyggjuvitið svona mikilvægt – að styðjast við gamaldags almenna skynsemi og hlusta á röddina innra með sér. Þetta geturðu prófað með einföldum hætti. Leggðu blómkál og bjúga hlið við hlið á eldhúsborðið og spyrðu þig með hjartanu:
„Hvor fæðutegundin er heilnæmari og nær náttúrunni? Hvor þeirra virkjar líkamann og færir honum neista og rafmagn?“