Á að skylda börn í almennar bólusetningar á Íslandi?

Vegna mikillar umræðu undanfarið um meinta lága þátttöku barna í bólusetningum hér á landi og hættu á að hér gætu komið upp faraldrar af völdum smitsjúkdóma sem hindra má með bólusetningum, sérstaklega mislinga, vill sóttvarnalæknir skýra betur tölur um þátttöku í bólusetningum sem finna má í bólusetningagrunni sóttvarnalæknis.

Um 2% barna sem fædd eru á árunum 1995 – 2012 vantar allar bólusetningar sem túlka má að foreldrar þessara barna hafa líklega valið að bólusetja þau ekki. Þetta er í samræmi við niðurstöðu rannsóknar hér á landi um að rúmlega 95% almennings er mjög hlynntur bólusetningum barna. 

Um 6% barna sem fædd eru á árunum 1995 – 2012 eru óbólusett gegn mislingum eða um 260 börn í hverjum árgangi. Þessar tölur eru mjög svipaðar þátttökutölum frá hinum Norðurlöndunum. Börn hér á landi sem bólusett hafa verið gegn mislingum hafa ýmist fengið eina eða tvær bólusetningar en áætlað er að um 93% þeirra sem fengið hafa eina bólusetningu séu varin gegn mislingum en um 97% þeirra eftir tvær bólusetningar eins og mælt er með í dag.

Almenn þátttaka í bólusetningum hér á landi er því góð þó þátttökuna megi bæta við 12 mánaða, 18 mánaða og 4 ára aldur. Ófullnægjandi þátttaka á þessum aldursskeiðum virðist því fremur vera af tæknilegum toga en andstöðu foreldra. Til að bregðast við þessu hefur sóttvarnalæknir verið í samvinnu við heilsugæsluna um að kalla inn óbólusett og vanbólusett börn.

Það er því skoðun sóttvarnalæknis að engin sérstök ástæða sé um þessar mundir að lögleiða skyldu til bólusetningar til að bæta almenna þátttöku barna. Miklu frekar þarf að bæta innköllunarkerfi heilsugæslunnar og að fræða foreldra og heilbrigðistarfsmenn um mikilvægi bólusetninga til að halda hér uppi góðri þátttöku.

Sóttvarnalæknir

Fengið af vef landlaeknir.is