Glimmrandi góður bakaður blómkálshaus með grænu salati

Hefur þú bakað blómkál? Heilan blómkálshaus?

Þessi uppskrift er dásamleg, ég hef prufaði hana sjálf og varð ekki fyrir vonbrigðum.

Þetta hráefni þarftu:

Stóran blómkálshaus

1 msk af ólífuolíu

1og ½ bolli af grískum jógúrt – ég notaði kotasælu

1 lime, kreista safann og kjötið innan úr

2 msk af chilly dufti

1 msk af cumin – ég sleppti því

1 msk af hvítlauksdufti

1 tsk af karrý

2 tsk af góðu salti

1 tsk af svörtum pipar

Leiðbeiningar:

1. Hitaðu ofninn í 180 – 200°
2. Hreinsaðu blómkálshausinn vel, taktu allt grænt af honum og skerðu stofninn í miðjunni vel niður
3. Taktu stóra skál og blandaðu öllum hráefnunum saman.
4. Skelltu nú blómkálshausnum í blönduna í skálinni, settu hann ofan í, á haus og notaðu bara hendurnar til að maka á hann allri blöndunni.
5. Settu nú blómkálshausinn í eldfast mót og settu í heitan ofninn í 30 til 40 mínútur.

Marineringin bakast fallega utan um blómkálshausinn.

Taktu hann út þegar hann er tilbúinn og leyfðu að standa í 10 mínútur til að kólna aðeins áður en það er skorið í hann.

Berðu fram með grænu salati og kreistu yfir lime og helltu einnig dassi af olíu yfir.

Þetta er dásamlega gott.

Njótið~