RAW Randalína - Birnumolar

Það er eitthvað svo huggulegt við að eiga góða hráköku í frystinum. Í gærkvöldi fór ég með tveimur góðum vinkonum í kvöldgöngu á Úlfarsfell. Þar sem við erum allar í næringarfræði í HÍ þarf alltaf að vera eitthvað nærandi og matarkyns í okkar hittingum  Til að gera langa sögu stutta þá smakkaðist þessi kaka ljómandi vel í kvöldsólinni!

Botn

• 50 g pekanhnetur
• 50 g möndlur
• 75 g ósaltaðar jarðhnetur
• 1/2 - 1 msk repjuolía (til mýkingar - prófið ykkur áfram)
• 1 msk fínt hnetusmjör
• 1 msk hunang
• 1 tsk vanilludropar

Millilag

• 100 g möndlur
• 2 msk hreint kakóduft
• 10 ferskar döðlur
• 1 lúka kókosmjöl
• 1 tsk hunang

Toppur - Döðlukaramella

• 12 ferskar döðlur
• 1/2 tsk vanilludropar
• Salt á hnífsoddi
• 2-3 msk vatn

Annað

Gott getur verið að stinga heilum jarðhnetum á milli laga og ofan á herlegheitin. Gefur smá extra bit!

Aðferð

1)  Setjið pekanhnetur, möndlur og jarðhnetur í matvinnsluvél mixið vel. Bætið þá við olíu, hunangi og vanilludropum. Vinnið allt vel saman eða þar til þið eruð komin með blöndu sem auðvelt er að þrýsta í form. 

2) Þrýstið öllu úr lið 1 jafnt niður í form (ég notaði 25cm hring) og geymið í frysti á meðan þið útbúið millilagið

3) Malið möndlur í matvinnsluvél og blandið kakóinu saman við. Bætið döðlum, kókosmjöli og hunangi við og vinnið allt vel saman. Takið formið úr frysti og jafnið þetta lag yfir botninn. Geymið í frysti meðan þið útbúið toppinn.

4) Sjóðið upp á döðlunum í potti. Vinnið döðlurnar í matvinnsluvél ásamt vanillu, agnarögn af salti og vatni. Dreifið þunnu laginu yfir kökuna.

5) Geymið í kæli/frysti og njótið þegar löngunin brýst fram - já eða þegar þið farið í fjallgöngur með góðum vinum.

Birt í samstarfi við