VIÐTALIÐ: Fyrstur Íslendinga í mark í Laugavegshlaupinu

"Ég mæli með fyrir hvern sem er að hlaupa, að hlaupa Laugaveginn." segir Benoit Branger sem kom fyrstur Íslendingar í mark í Laugavegshlaupinu.

Fullt nafn: 

Benoit Branger

Segðu okkur aðeins frá sjálfum þér og hvaðan ertu ?

Ég er 32 ára Frakki en bý í Reykjavík. Ég á 6 ára gamla dóttur og hef búið hér á Íslandi í 3 ár. Ég og Ísland eigum okkur þó miklu lengri sögu því ég steig fyrst hér fæti fyrir10 árum síðan.

Menntun og við hvað starfar þú í dag ?

Ég er með mastersgráðu í rafmagnsverkfræði sem ég öðlaðist við háskólann í Grenoble. Ég starfa sem verkfræðingur hjá Sabre Airline solutions sem er fyrirtæki sem séhæfir sig í upplýsingatækni í ferðaiðnaðinum.

Hver eru þín helstu áhugamál fyrir utan hlaupin ?

Ég er tónlistarunnandi og get hlustað á nánast hvað sem er og mér finnst gaman að fá tónlistalegar upplifanir á tónleikum og tónlistarhátíðum. Ég hef mikla unun af því að ferðast og ég er svo heppin að geta sinnt því áhugamáli í starfi mínu og þegar ég ferðast til að keppa í hlaupum.

Bakgrunnur í íþróttum ?

Frá 12 ára aldri æfði ég fótbolta og í nokkur ár spretthlaup. Milli 16 og 18 ára aldurs æfði ég víðavangshlaup. Í þrjú ár eftir það æfði ég Ultimate Frisbee en snéri mér alfarið að hlaupum eftir meiðsli í hné.

Hver var kveikjan að því að þú færir að æfa hlaup?

Ég hafði alltaf gaman að hlaupa en ég hafði meiri áhuga á hópíþróttum í mörg ár. Hlaup hafa alltaf verið í höfðinu á mér. Ég meiddist a hné árið 2009 og eftir aðgerðina og endurhæfinguna mældi læknirinn með því að ég hlypi til að styrkjast. Á sama tíma voru samstarfsfélagar mínir að hlaupa á hverjum degi í hádeginu. Ég ákvað að fara með þeim og þannig byrjaði það í raun.

Hvað er erfiðasta hlaupið sem þú hefur tekið þátt í og af hverju?

OCC (Orsieres-Champex-Chamonix) sem er hluti af UTMB í Chamonix. Það er 53 km langt fjallahlaup með samanlagðri 3.300m hækkun, hlaupið er í virkilega stórbrotnu landslagi.  Hlaupaleiðin sjálf er frekar erfið en samsetning af hita og hækkun gerir hlaupið ennþá erfiðara.  Til gamans má geta að magnið af vökva sem ég drakk í keppninni síðasta sumar var 7 lítrar á 6 klst og 27 mínútum.

Ef við snúum okkur að nýjasta afrekinu, Laugarvegshlaupinu þar sem þú varst í 3. sæti, hvað hefur þú hlaupið það oft og hver er best tíminn þinn á þessari vegalengd? Stefnir þú á Laugaveginn aftur næsta ár?

Þetta var þriðja Laugavegshlaupið mitt. Ég hljóp Laugaveginn fyrst árið 2013 þá á tímanum  6 klst og 2 mínútur.  Ég bætti mig svo um klukkutíma árið 2014 og hljóp á 5 klst og 7 mínútum. Í ár náði ég óvæntum tíma þegar ég hljóp Laugaveginn á 4 klst og 35 mínútum.  Ég hef ekki ákveðið hvort ég muni hlaupa Laugaveginn aftur að ári þar sem ég á eftir að setja niður markmið mín fyrir næsta ár.  Ég mæli með fyrir hvern sem er að hlaupa, að hlaupa Laugaveginn.

Hvað hleypur þú marga km síðustu 2 vikurnar fyrir hlaupið?

Ég hleyp ekki mikið magn miðað við aðra hlaupara. Dæmigerð vika fyrir Laugaveginn var 85km og 110km að hámarki.  Ég kýs frekar að hugsa um fjölda klukkustunda á hreyfingu en kílómetra. Ég held það sé betri mælikvarði fyrir fjallahlaup þar sem oft er mikil hækkun á þeim æfingum.

Ég reyni vanalega að minnka æfingamagnið um 20-30% síðutu vikuna fyrir keppni og svo 50-60% síðustu vikuna fyrir. En það fer eftir því hvernig mér líður hvort ég minnki magnið meira.  Markmiðið er alltaf að mæta ferskur á ráslínu.

Hvað borðar þú og drekkur á leiðinni?

Ég hef verið að nota GU gel í dágóðan tíma og þau henta mér vel. Ég er alltaf með kolvetnadrykki frá Overstim með mér fyrir langar vegalengdir.

Hvert er næsta stóra hlaup sem þú stefnir á og eru einhverjir viðburðir á döfinni á næsta ári?

Næsta stóra keppni verður líklega 55km fjallahlaup í Portúgal í lok október. Keppni sem er opin öllum er haldin samhliða heimsmeistaramótinu í fjallahlaupum.

Ég hef ekki skipulagt næsta ár, en mig hefur alltaf dreymt um að keppa í utanvegahlaupi í Bandaríkjunum. Kannski ég geri það á næsta ári.

Nefndu þrennt sem þú átt alltaf til í ísskápnum ?

Skyr, mjólk og smjör.

Hver er þinn uppáhalds matur & matsölustaður ?

Það er erfitt að velja einn ákveðinn en mér finnst kjöt ofsalega gott. Ég fer oft á Saffran til að borða en mér finnst Forréttabarinn frábær fyrir fínni máltíðir og tilefni.

Ert þú að lesa eitthvað þessa dagana og hver er besta bók sem þú hefur lesið ?

Ég les ekki mikið en ótrúlegt en satt þá var síðasta bók sem ég keypti og las um hlaup. Hún heitir: The Jack Daniel‘s method for running.

Ef þú ætlar að „tríta“ þig sérlega vel hvað gerir þú ?

Mér finnst einfaldlega frábært að fara í Laugardalslaug og fara í gufu og heitu pottana.

Hvað segir þú við sjálfa þig þegar þú þarft að takast á við stórt/erfitt verkefni ?

Ég minni sjálfan mig iðulega á vellíðunar- og hamingju tilfinninguna við að klára erfitt verkefni. Einnig finnst mér mikilvægt að einfaldlega minna mig á hversu mikil forréttindi það eru að geta gengið og hvað þá hlaupið.

Hvar sérð þú sjálfan þig fyrir þér eftir 5 ár ?

Mér finnst best að leyfa lífinu koma mér á óvart en ég vona svo sannarlega að ég muni áfram vera að njóta lífsins og hafa gaman af öllu sem ég geri.