Ýmsar birtingarmyndir ofbeldis

Einangrun:

• Kemur í veg fyrir að hún geti sótt vinnu, skóla, félagsstarf, tómstundastarf.
• Kemur í veg fyrir að hún hitti/eigi samskipti við fjölskyldu og/eða vini.
• Tekur af henni persónuskilríki, greiðslukort, ávísanahefti, ökuskírteini og fleira þess háttar.
• Eltir hana, fylgist með henni.
• Opnar póstinn hennar.
• Notar símnúmerabirti til að fylgjast með hverjir hringja til hennar.
• Hringir stöðugt heim til að vita hvort hún sé ekki heima.
• Fjarlægir símann.
• Spyr í þaula hvar hún hafi verið, hvað hún hafi verið að gera og hverja hún hafi hitt.Tortryggir gjarnan svörin.

Efnahagsleg stjórnun:

• Takmarkar aðgang hennar að peningum.
• Skammtar peninga, sem varla (eða ekki) duga fyrir nauðsynlegustu útgjöldum.
• Þvingar hana til að biðja um hverja krónu og/eða gera grein fyrir hverri krónu.
• Segir ósatt um stöðu fjármálanna, eða heldur fjármálunum leyndum.
• Kemur í veg fyrir að hún starfi utan heimilis, eða ráðstafar launum hennar.
• Tekur af henni peninga s.s. inneign í bankabók, arf o.fl.
• Kemur í veg fyrir að hún hafi greiðslukort, banka-eða ávísanareikning.
• Ráðstafar einn, og oft án hennar vitundar, sameiginlegum peningum þeirra.

Hótanir:

• Ógnar/hótar henni án orða s.s. með bendingum, hreyfingum eða svipbrigðum.
• Kastar/eyðileggur hluti.
• Eyðileggur persónulegar eigur hennar – og/eða annað sem henni er kært.
• Meiðir eða fargar gæludýrum á heimilinu.
• Meðhöndlar hnífa, vopn eða aðra hluti til að ógna henni.
• Hótar að drepa hana eða börnin.
• Hótar að fyrirfara sér.
• Hótar að láta reka hana úr landi, ef hún er af erlendum uppruna.
• Hótar að láta leggja hana inn á geðdeild.
• Hótar að segja „öllum“ hvað hún er „geðveik“.

Tilfinningaleg kúgun:

• Brýtur hana niður.
• Hrópar/öskrar á hana.
• Uppnefnir hana, gerir lítið úr því sem hún gerir, hæðist að henni.
• Gagnrýnir hana, setur stöðugt út á hana og verk hennar.
• Niðurlægir hana fyrir framan aðra.
• Lætur hana finna fyrir vanmetakennd og að hún sé heimsk eða barnaleg.
• Telur henni trú um að eitthvað sé að henni t.d. geðveiki.
• Stöðugar ásakanir, m.a. ásakar hann hana fyrir mistök sem hann sjálfur gerir.
• Ruglar raunveruleikanum, m.a. með því að segja að hennar upplifanir, útskýringar og túlkanir séu rangar.

Kynferðisleg misnotkun:

• Spottar/niðurlægir hana kynferðislega.
• Þvingar hana til kynlífsathafna, sem hún er mótfallin.
• Hótar að misbjóða börnunum kynferðislega.
• Þvingar hana til að horfa á klámmyndir og/eða skoða klámblöð.
• Nauðgar henni, eða hótar nauðgun.

Líkamlegt ofbeldi:

• Ýtir, hrindir eða slær til hennar.
• Snýr upp á útlimi.
• Heldur henni fastri, varnar útgöngu.
• Lemur hana, brennir hana.
• Skaðar hana t.d. með hnífi, barefli, belti, ól eða öðru þess háttar.

(Assessing Woman Battering in Mental Health Services, 1998. Edward W. Gondolf. ISBN 0-77619-1107-3). Vilborg G. Guðnadóttir, hjúkrunarfræðingur tók saman og þýddi 1998.

Greinin er fengin af vef Kvennaathvarfsins og er birt á vef doktor.is með góðfúslegu leyfi.